Gin-aprubahan na sang Regional Inter-Agency Task Force (RIATF) ang moratorium nga ginpangayo sang syudad sang Bacolod sa pagpauli sang mga Locally Stranded Individuals (LSI) humalin sa Disyembre 21 tubtob Enero 3, 2021.
Sa interview sang Bombo Radyo kay Bacolod City Administrator Em Ang, ginkompirmar sini nga naaprubahan na sang RIATF ang request nga moratorium gani wala na sang makasulod nga LSI sa syudad sa nasambit nga petsa.
Suno kay Ang, tinutuyo sang moratorium nga mahatagan sang ligwa ang pagpakay-o sang mga quarantine facilities sang syudad kag mahatagan sang malip-ot nga tion nga makapahuway ang mga healthcare workers humalin sang nag-umpisa ang COVID-19 infection sa syudad.
Kun lantawon suno sa iya, wala na kuntani sang mga LSI bangud halos napulo na kabulan ang ginapangatubang nga pandemya.
Nagapangayo man si Ang sang paghangop sa mga Bacolodnon nga natalana na nga magpauli sa Disyembre 21 tubtob Enero 3 sa madason nga tuig bangud ipatuman na ang moratorium.
Nagpanugyan ang City Administrator sang syudad nga magpauli antes ang Disyembre 21 ukon matapos ang Enero 3.
Gin-athag man sini nga ang nag-aprubar sang moratorium amo ang RIATF apang napahibalo man ang National Inter-Agency Task Force (NIATF).
Sa pihak nga bahin nagpahanumdom man si Ang nga likawan ang mga reunions apang mahimo magselebrar sang holiday nga responsable kag tumanon ang mga health protocols bangud indi malikawan ang pagselebrar sang Christmas bangud ini ang isa sa pinakaimportante nga holiday sa mga Filipino.
Suno diri, kun liwat nga magtaas ang kaso sang infection sang COVID-19 pagkatapos sang Christmas, mahimo man nga magtaas ang quarantine status sang syudad bangud man nga ang ginabasehan sang NIATF sa classification sang quarantine status amo ang previous month nga staus sang COVID-19 cases sa tagsa ka Local Government Unit (LGU).
