Nagahingyo si Bacolod City Councilor Ayesha Villaflor sa mga authorized person outside residence (APOR) nga hatagan sila sang nagakaigo nga tion agud magproseso sang letter of acceptance bangud isa sa ila mga problema sa karun ang mga on the spot nga request.
Sa interview sang Bombo Radyo kay Villaflor, ginpahayag sini nga ang mga requirements sang mga APOR ang ginalakipan sang companiy ID, letter of engagement kag ginarekomender man sini ang negatibo nga swab test results agud masigurado ang kaluwasan sang pamilya sang natungdan kag mga kaupdanan sa ubra.
Suno sa konsehal, sarang ang mga ini ma-email sa apor.bacolod2020.gmail.com.
Aminado man ini nga isa sa ila mga challenge ang mga APOR nga nagapangayo sang letter of acceptance on the spot kag kun indi mahatag, nagapangakig pa ang mga ini.
Suno sa iya, hatagan sila sang duha tubtob tatlo ka adlaw sa pagproseso bangud indi ini madali-dali kag ila man ginahimo ang tanan agud maaccomodate ang mga request.
Gin-athag man ni Villaflor nga ginakabig nga APOR amu ang mga empleyado sang Bacolod nagikan sa luwas sang ciudad ukon mga Bacolodnon nga nagpadulong sa sagwa sang ciudad sang indi maglapaw sa isa ka semana.
Samtang ginakabig naman nga mga locally stranded individuals ang mga taga Bacolod nga nagpadulong sa sagwa sang probinsya bangud sa ubra sa masobra isa ka semana.
Suno sa iya, kun masobra isa ka semana nga nagtinir ang Bacolodnon sa luwas sang probinsya, posible nga madamo na ini sang may nakadtuan kag nagakadapat nga iswab agud masigurado ang iya kaluwasan.
