Ginpahayag sang Provincial Health Office nga sarang na nga malift ang lockdown sa Barangay Nato, banwa sang La Castellana kun sa diin nagapuyo si Patient No. 2 sang probinsya matapos magnegatibo ini sa iya second swab testing.
Suno kay Dr. Ernell Tumimbang, ginpahayag sini nga nagnegatibo na sa ikaduha nga polymerase chain reaction test ang nasambit nga pasyente gani ginarekomendar sini ang paglift sang lockdown sa Brgy. Nato.
Suno sa iya, naka-isolate ini gihapon kag magapaidalom liwat sa ika-tatlo nga test kag kun mag-negatibo, sarang na ini nga makagwa.
Suno kay Tumimbang, ini bangud nagnegatibo man sa virus ang pamilya kag mga nakacontact tracing sang pasyente.
Madumduman nga ginkompirmar ni Mayor Rhumyla Nicor-Mangilimutan sang Abril 21 nga nagpositibo ang 43-anyos nga driver ni WV 37 kag WV 38 nga lunsay mag-asawa nagikan sa Pavia, Iloilo.
Matapos mabaton ang resulta, nagpapanaog ini sang executive order nga nga nagapaidalom sang Brgy. Nato sa Extreme Community Quarantine samtang nagapabilin naman sa Enhanced Community Quarantine (ECQ) apang ginadumilian ang pagbyahe sang mga tricycle, trisikad kag e-bike.
