Ginkumpirmar ni Governor Eugenio Jose “Bong” Lacson nga boluntaryo nga tikang sang provincial government ang pagpasira sang Kapitolyo sa sulod sang tatlo ka adlaw bangud sa nagadamo nga kaso sang COVID-19 sa mga empleyado.
Sa interview sang Bombo Radyo kay Lacson, ginpahayag sini nga nagakabalaka na ang mga empleyado sang kapitolyo bangud adlaw adlaw may nagadugang nga kaso sang COVID-19 gani ila gindesisyunan nga siraduhan ini sa sulod sang tatlo ka adlaw agud mahibaluan ang sitwasyon sa main capitol building.
Suno kay Lacson, ginalauman sini nga magpabilin sa ila mga puluy-an kag indi maggwa ang mga empleyado.
Nagpanawagan ini nga kuntani indi pag-itake advantage ang sitwasyon kag magpabilin na lang anay sa ila balay tubtob magbalik ang operasyon sang capitol building.
Nagapangayo man ini sang pasensya sa mga empleyado sang kapitolyo kag nag-abiso nga ubrahon lang kun ano ang ila sarang nga maubra sa ila balay.
Nagpahanumdum man ini sa mga pumuluyo nga mangin vigilante kag magsunod sa mga health protocols.
Sa pihak nga bahin, nagbukas na kahapon ang Land Transportation Office nga ginlockdown duha na ka semana ang nakaligad matapos magbisita diri ang isa ka locally stranded individual nga positibo sa COVID-19.
