Ginkakas na ang lockdown sa Purok Bayanihan, Barangay Banago, ciudad sang Bacolod matapos magnegatibo sa repeat test ang COVID patient no. 9 sa ciudad.
Una na nga ginkumpirmar ni Dr. Grace Tan, spokesperson sang Bacolod Inter-Agency Task Force Against COVID-19 nga nagnegatibo sa ikaduha nga RT-PCR test ang patient number 9 gani siya ang makabig na nga recovered ukon nag-ayo na sa COVID-19.
Magluwas sa pasyente, nagnegatibo man sa test ang pila sa kaupod sini sa balay kag mga kaingod sang pasyente sa Purok Bayanihan.
Ang resulta nalang sang swab test sang duha ka kaupod ni patient number 9 sa iya balay ang ginahulat sang City Health Office.
Kahapon, nakagwa na ang mga ini sa quarantine facility.
Madumduman nga ang 65-anyos nga babayi nga residente sang Purok Bayanihan, Barangay Banago ang nagsuprer sang ubo sang Abril 3 kag nagpakonsulta sa City Health Office sang Abril 17.
Ang swab test ang ginhimo para sa PCR testing kag ginpadala sa Iloilo Bio Lab sang Abril 21.
Si Patient No. 9 ang naga-istar sa iya nga balay kag wala sang history of travel.
Isa ini kag TB patient kag sa karun magapatigayon pa sang ikaduha nga test agud iverify ang result.
