Tuman ang kakibot sang monghe kag pamilya sang lola nga ginpatihan nga patay na kag ipaidalum na kun tani sa cremation matapos nga nanuktok ini kag naghibi sa sulod sang iya lungon sa isa ka templo sa Thailand.
Suno sa pamilya, duha ka tuig na nga bedridden ang ila lola kag pila ka adlaw ini nga wala nagkaon antes malipongan tubtob nga nag-untat na ini sa pagginhawa.
Wala na gindala sang pamilya ang lola sa doktor kag nagpati nga nagtaliwan na ang tigulang.
Gilayon nila nga gin-asikaso ang mga dokumento agud mabyahe ang bangkay padulong sa templo nga nagahatag sang libre nga cremation kag funeral service.
Ginbutang sa lungon ang lola kag ginbyahe sa masobra 300 kilometros.
Dal-on na kuntani sa hall ang lungon para sa seremonya antes ang cremation apang nakabati sila nga may nagapanuktok kag nagahibi sa sulod
Suno sa temple worker nga si Thammanoon, naglili ini sa sulod sang lungon kag nakibot nga nagagiyo pa ang tigulang, nagaginhawa kag naga-ungo sang iya ulo apang wala ini nagahambal.
Gilayon nga nagpatawag sang ambulansya ang pamilya kag gindala ini sa pinakamalapit nga ospital.
Suno sa mga doktor, wala sang may nakit-an nga senyales sang respiratory ukon cardiac arrest sa lola apang ini nagsuprer sang hypoglycemia ukon ang tuman nga pagnubo sang sugar level nga posible nagresulta sa comatose.
Sa karun padayon nga ginabulong ang lola kag nagabulig man ang templo sa iya medical expenses.
