Tuman ang kasubo nga nabatyagan sang mga abyan sang Overseas Filipino Worker nga ginpatay sang militante nga grupo nga Hamas sa pag-atake sini sa Israel.
Sa interview sang Bombo Radyo kay Bombo International News Correspondent Angel Marenias direkta sa Israel, Oktubre 7, naglakat sa Ashkelon si Loreta Alacre kaupod ang iya nobyo nga chinese national kag tatlo man ka abyan sini nga lunsay mga chinese national.
Suno diri, wala ini sang ideya nga nagpadulong si Loreta sa Sukkot music festival sa Re-im nga malapit sa border sang Gaza.
Alas 6:00 sang aga, nagmessage si Loreta nga yara ini sa Sukkot Festival apang ini ginhingyoan ni Marenias nga magpauli bangod nga delikado ang lugar.
Alas 6:30 sang naghuni ang siren kag ginmessage sini si Loreat nga magpauli na kag ini nabasahan ni Loreta apang wala na ini nakareply.
Makapila nga beses nga gintawagan sini ang cellphone ni Loreta apang wala ini nagasabat.
Suno kay Marenias, sa panaysayon sang abyan sang nobyo ni Loreta, nagsakay sila sa salakyan para magpauli, apang sila ginharangan sang Hamas kag ginpapanaog.
Ginkastigo kag ginluthang ang nobyo ni Loreta nga gindala pa sa ospital apang ini nagtaliwan na, patay man ang isa nila ka upod, isa missing kag ang isa naman naka-survive.
Suno kay Marenias, may yara sila sang isa ka abyan nga si Karen nga may ligwa nga makagwa nga amo ang ila ginasugo nga magpadulong sa mga ospital agud pangitaon si Loreta.
Pila ka ospital ang ginpadulongan sini kag ginpanagtagan sang litrato ni Loreta.
Nakabaton na lamang sila sang impormasyon naggikan sa Philippine Embassy sa Israel nga nakit-an na si Loreta kag ini wala na sang kabuhi.
Gindumdum ni Marenias ang tatlo ka tuig nga pag-inupdanay nila ni Loreta kun sa diin ulihi sila nga magkaupod sadtong Setyembre 29 nga kaadlawan ni Marenias kun sa diin siya ginbaklan pa sang cake ni Loreta kag ginbalikan man sini kun ano ka sadya ang ulihi nila nga pag-inupdanay.
