Ginpakigbahin sang aktor nga si Seth Fedelin ang litrato sini kadungan sang caption nga “Kape Tayo?” nga may kaupod nga heart emoji sa iya nga Instagram Acount sang Sabado sang gab-i kasunod sang pagsulod sang iya nga love team partner nga si Andrea Brillantes kag University of the Philippines (UP) Fighting Maroon player nga si Ricci Rivero sa opisyal nga relasyon.
Ang litrato nga ginkuha sang adlaw palang, ang nagapakita sang nagayuhom nga aktor nga kaangay nga nagakalingaw ini sa kanami sang palibot samtang ginakaptan naman sini ang mug sang kape.
Sang Sabado sang gab-i madumduman nga ginsurpresa ni Rivero ang mga tumalan-aw sa Mall of Asia (MOA) Arena matapos sang nangin mensahe sini kay Brillantes kasunod sang ila nga hampang.
Ang 6-foot-1 nga shooting guard ang nagpasalamat sa mga tumalan-aw sa pagcheer para sa Fighting Maroons apang kasunod sini ginbuy-an na niya ang mga litanya nga “will you be my girlfriend”.
Gilayon naman ini nga nakaganar sang paghinugyaw sang mga tumalan-aw kadungan sa pagkawitness sa aktres sang ginpakita na sini ang t-shirt nga may nakaprint nga dako nga “YES”.
Sa twitter, ginpahayag ni Brillantes nha first time siya nga naglantaw sang UAAP kag wala gid sini gin-ekspektar ang himuon ni Rivero.
Pahayag sini nga una nga beses palang siya nga maglantaw sang UAAP apang wala siya nagalaom nga siya ang makaganar sang boyfriend.
Madumduman nga sang Enero, si Fedelin ang nagpahayag nga “forever” ang love team nila ni Brillantes.
Pahayag sini sadto nga ang SethDrea ang magaconquer sang kalibutan kag suno diri sa iya nga ginhambal nasabat naman ang mga palamangkutanon sang publiko.
