Love triangle ang isa sa mga motibo nga ginalantaw sang Bacolod Police Station 2 kun ngaa ginpatay si Joenard Esquilla sa gwa sang ila nga balay sa Purok Sigay, Barangay 2, Bacolod City kagab-i.
Sa interview sang Bombo Radyo kay Police Lt. Jonito Pastrana, deputy station commander sang Bacolod Police Station 2, duha ka mga lalaki ang nagkadto sa balay nanday Esquilla kun sa diin ginpagwa nila ang live-in partner sini kag gintiro ang biktima sa gwa sang pwertahan.
Apat ka empty shells sang caliber .45 ang narecover sa crime scene kag nag-agom si Esquilla sang pila sa kilid kag paa.
Suno kay Pastrana, ang bana sang live-in partner ni Esquilla ang nadakpan sadto sa drug buybust operation kag wala pa nakagwa sa prisuhan tubtub subong.
Bangud ginasaligan kag masami ginalihog sa balay sang naaresto si Esquilla, diri na ini nagtinir tubtub nga ginsuhot niya ang babayi kag ginpuyo.
Suno kay Pastrana, may kapasidad man ang bana sang babayi nga magkuha sang suguon para sa krimen bisan ini ang yara sa prisuhan.
Suno sa deputy station commander, ang live in-partner kuntani ang makahatag sang dughang nga impormasyon sa insidente apang wala ini sa ila balay halin kagab-i.
