Love triangle ang inisyal nga motibo nga ginalantaw sang Bacolod Police Station 8 sa pagtiro sa 31-anyos nga lalaki sa likod sang isa ka motel sa Purok Gracia, Barangay Singcang Airport kagab-i.
Suno kay Police Major Joery Puerto, station commander sang Bacolod Police Station 8, ang biktima nga si Angelo Tamparong ang tumandok sang banwa sang Hinigaran apang nagbisita ini sa balay sang iya anay live-in partner sa Barangay Singcang Airport.
Paggwa sang biktima sa balay sang iya anay live-in partner, ginlagas ini sang mga suspetsado nga nagasakay sa motorsiklo gani nagdalagan ini padulong sa likod sang motel kun sa diin siya naabutan kag gintiro.
Bangud sa pilas sa ulo, gilayon nga napatay ang biktima.
Suno kay Puerto, love triangle ang motibo nga ginalantaw sa krimen bangud may ginapuyo naman ang anay live-in partner ni Tamparong.
Sa pihak sini, ginausisa pa man sang Police Station 8 ang iban pa nga anggulo nga naangot sa krimen bangud sa karon, wala pa naistorya ang pamilya sang biktima.
