Patay ang 34 anyos nga banana vendor matapos gintiro sang bana sang iya nga karelasyon sa Purok Malipayon, Barangay 35, ciudad sang Bacolod, kahapon sang hapon.
Ang biktima ang ginkilala nga si Ian Tigolo, kasado, samtang ang suspetsado naman amo si Junary Canillas, 27 anyos, lunsay mga residente sang nasambit nga lugar.
Sa interview sang Bombo Radyo kay Police Lieutenant Ramie Sayson, deputy station commander sang Police Station 1, nagpadulong si Canillas sa balay nga ginarentahan ni Tigolo kag ini ang gintiro.
Suno diri, ang asawa ni Canillas nga si Joan Villaran kag si Tigolo ang ginapatihan nga may ginatago nga relasyon kag nagrenta si Tigolo sang balay malapit lang man sa puluy-an sang mag-asawa.
Naaktohan ni Canillas nga yara sa sulod sang kwarto ni Tiglo ang iya asawa gani iya ini nga gintiro sa dughan nga gintunaan sang iya kamatayon.
Indi ini ang una nga bes nga gintiro ni Canillas si Tigolo bangud gintiro niya man ini tinalikdan nga tuig apang wala naigo.
Sa karun, padayon pa ang hot pursuit operation sang kapulisan kay Canillas matapos nga nagpalagyo, samtang wala nahibaluan kun sa diin si Joan.
Nakabati sang duha ka lupok ang isa ka residente sang Purok Malipayon, Barangay 35, Bacolod City kadungan sang pagpatay ni Junary Canillas kay Ian Tigolo sa sulod sang iya kwarto.
Suno sa isa ka residente, masami sini makita nga magka-upod sanday Ian kag Joan Villaran, misis ni Canillas, samtang ang bana ni Joan ang gab-i na kun magpauli bangod nga nagalibod ini sang saging.
Suno sa mga residente, mismo si Joan ang nagalagas kay Tigolo gani nagrenta ang biktima sang balay, isa lang ka balay ang igutlan sa ila nga puluy-an.
Gintago ni Canillas sa sulod sang iya bayo ang armas nga gingamit sini sa pagpatay sa gina-alegar nga lover sang iya asawa.
Sa interview sang Bombo Radyo kay Barangay Kagawad Gibis Alejandrino, love triangle ang ginalantaw nga anggulo sa pagpatay.
Suno diri madugay na nga may away sanday Ian kag Junary.
Matapos nga gintiro ni Junary si Ian, nalagyo ini kag bitbit ang iya armas nga ginatago sini sa sulod sang iya bayo.
Bangod madamo sang lulutsan sa purok, nakapalagyo gilayon si Canillas.
Samtang, wala naman sang may narekober nga basiyo sang bala sa crime scene.
Ginpahayag sang stepfather sang biktima nga si Ian Tigolo nga madugay na sini nga ginhambalan ang iya manak nga untaton ang kun ano man ang may yara sa ila ni Joan Villaran bangod sila nga duha ang may tagsa na ka pamilya.
Sa interview sang Bombo Radyo kay George Canillas, kun istoryahon sini si Ian angot sa relasyon nila ni Joan, iya ini nga ginapanginwala.
Suno diri, sa iya paglantaw kapin isa na ka tuig nga may relasyon ang duha.
Si Ian ang may tatlo ka kabataan nga naga-edad sang 14 anyos, walo kag lima ka tuig nga lunsay mga babayi, nga kaupod man sini sa iya ginarentahan nga kwarto samtang ang iya naman nga asawa ang nagatrabaho bilang overseas Flipino worker.
Si Joan Villaran naman ang may apat ka kabataan kag live -in partner sini si Junary Canillas, nga amo ang nagpatay kay Ian.
Pahayag ni George, madugay na sini nga ginahambalan ang iya manak nga likawan ang babayi kag utdon ang ila relasyon bangod sila ang may tagsa ka pamilya apang wala gid ini namati.
Suno kay George manak niya si Ian, ang bitktima, samtang si Junary naman nga supek, ang iya hinablos sa pakaisa.
Samtang suno naman sa bayaw sang suspek, mabuot gid ini nga kalse sang tawo si Canillas kag masakit para sa iya nga sa pihak sang maayo sini nga pamatasan, ini pa ang natabo.
Sa interview sang Bombo Radyo kay Marivic Canillas, wala sang trabaho si Joan kag sa karun nagabusong pa ini sang ikaapat nga bata apang gindudahan pa kun ini bala bata ni Junary ukon ni Ian.
