Masobra na sa dos mil seis sientos ka mga locally-stranded individuals (LSIs) kag repatriated overseas Filipino workers (OFWs) ang nakapauli sa probinsya sang Negros Occidental humalin sang Marso 30.
Suno kay Governor Eugenio Jose “Bong” Lacson, sa pinakaulihi nga data nga ila nabaton asta sang Hunyo 10, may kabug-usan nga 949 ka mga repatriated OFWs kag 1,459 naman ka mga LSIs ang nakapauli na sa probinsya.
Kahapon, may nagdugang nga 60 ka mga repatriated OFWs nga nag-abot sa Bredco Port paagi sa 2Go Malasakit voyage samtang 155 naman ka mga LSIs ang nag-abot sa Bacolod-Silay Airport via PAL Sweeper Flight.
Gilayon man sila nga ginkuhaan sang swab sample kag gin-endorso sa tagsa nila ka mga local government units (LGUs) para sa mandatory quarantine.
Samtang, suno kay Lacson, nagadangat na sa 778 ka mga swab samples ang napadala sa molecular laboratory sa Teresita Lopez Jalandoni Provincial Hospital kag nakapagwa na ini sang 272 results.
Samtang, ginkumpirmar man sang gobernador nga si Bacolod Patient No. 18 nga isa ka 32-anyos nga lalaki nga taga-Barangay Bata ang family driver gid man sang isa ka Board Member sa Southern Part sang Negros Occidental.
Apang, gin-athag sini nga madugay na nga wala naka-close contact ang amo nga pasyente sa opisyal sang probinsya bangud bulan sang Pebrero pa lang sang wala na ini naga-duty apang padayon ang pagbaton sang sweldo.
Gani, wala sang dapat kabalak-an ang mga empleyado sang Kapitolyo.
