BACOLOD CITY-Gin-relieve na sa iya pwesto sa Bacolod City Police Office (BCPO) nga si Police Lt. Colonel Jovie Espenido.
Santo sa kumpirmasyon ni Police Lt. Colonel Joem Malong, spokesperson sang Police Regional Office (PRO) 6, Pebrero 5 pa epektibo ang relief order ni Espenido nga nagapungko karun nga head sang City Drug Enforcement Unit (CDEU) sang BCPO kag Deputy City Director for Operations.
Ang nasambit nga relief order ang ginpaguwa mismo sang national headquarters sang Philippine National Police (PNP).
Santo man sa order, magareport na si Espenido sa Office of the Chief PNP.
Apang wala nasaad sa order ang rason kun ngaa ginkakas ini sa iya pwesto sa BCPO.
Nagligad lang nga Oktubre 2019 sang gin-assign si Espenido sa Bacolod.
Madumduman nga nangin kontrobersyal ang nasambit nga opisyal bangud man sang pila ka mga police operations nga ginkamatay sang pila ka gina-alegar durugista partikular na sanday anay Albuera, Leyte Mayor Rolando Espinosa kag Ozamiz City Mayor Reynaldo Parojinog.
