Ginpahayag sang tagpamaba sang Land Transportation Franchising and Regulatory Board (LTFRB) Region 6 nga lima lamang ka mga persona ang ginapahanugutan nga magtindog ukon magstanding sa modernized jeepney apang ang ila enforcement sang regulasyon ang may yara man sang konsiderasyon.
Sa interview sang Bombo Radyo kay LTFRB Region 6 spokesperson Atty. Salvador Altura, apisar nga lima lamang dapat ka mga persona ang sarang nga maka-standing sa sulod sang modernized jeepney, kun mismo ang pasahero na lamang ang nagpasugot nga magtindog bangud nga kulang ang salakyan, sila ang magahatag man sang konsiderasyon.
Suno kay Altura, ang paglapaw sa lima ka mga pasahero nga nagastanding ang bayolasyon sa terms and conditions sang franchise apang antes nila ini i-enforce, ila anay ginalantaw ang kinahanglanon sang publiko.
Ginpaanggid sini ang sitwasyon nga madamo sang pasahero nga nagahulat sa dalan samtang naga-ulan, kun sa diin kun piliton enforce nga lima lamang ang sarang mapasakay, sila ang mabasa kag indi makapauli.
Suno diri, kun ginapilit ang isa ka pasahero nga magsakay maskin gutok, indi ini pwede apang kun mismo ang pasahero na man lang ang luyag magsakay maskin puno ang jeep, ila ini ginahatagan konsiderasyon.
Suno sa iya, kun may magreklamo nga pasahero tuhoy sa nasambit nga issue, dapat magpasa ini sang nagakaigo nga ebidensya kaangay na lamang sang mga pictures.
P5,000 ang multa sa coop sa first offense; P10,000 sa second offense kag 30 days suspension sang franchise sang kooperatiba; kag P15,000 naman sa third offense kag kanselasyon sang franchise sa bilog nga coop.
Suno sa tagpamaba sang LTFRB, ila ginabalanse ang sitwasyon agud ma-address sang maayo ang kinahanglanon sang publiko apang wala man sila nagahambal nga indi nila pag-apply ang regulasyon sa nagakaigo nga panahon kag sirkumstansya.
