Ginpahayag sang Land Transportation Franchising and Regulatory Board (LTFRB) nga suportado sa gihapon ni President Ferdinand “Bongbong” Marcos Jr. ang Public Utility Vehicle Modernization Program (PUVMP) sang gobyerno apisar sang isa ka Senate resolution nga nagarekomendar sang suspension sini.
Suno kay LTFRB chairperson Teofilo Guadiz III, nagapadayon ang programa kag ginasuportahan ini sang Presidente.
Suno sa iya, ini ang magapadayon tubtob sa final stages sang modernisasyon.
Suno diri, paagi sa Department of Transportation, ang bilog nga pungsod ang makasalig sa Presidente nga wala sang may matabo nga suspension kag magapadayon ang programa.
Madumduman nga 22 sa 23 ka mga Senador ang nagperma sang isa ka proposed Senate Resolution 1096 nga nagahangkat sa gobyerno nga temporaryo nga suspendihon ang implementasyon sang PUVMP ukon ang Public Transport Modernization Program (PTMP).
Kahapon, nagpatigayon sang isa ka “unity walk” ang mga kooperatiba kag korporasyon nga nagapabor sa PTMP bilang pagpabutyag sang pagpamatok sa resolusyon sang Senado.
