Ginpasalig sang planning officer 3 sang Land Transportation Franchising and Regulatory Board (LTFRB) Region 6 nga ipasaka sini ang concerns sang mga drivers sa syudad sang Bacolod kag Probinsya sang Negros Occidental sa higher office sang ahensya.
Nahibaluan nga kahapon, nagpatigayon sang pagsapol ang LTFRB 6 sa mga transport sector sa syudad kag probinsya kaupod kanday Bacolod City Lone District Congressman Greg Gasataya kag House Minority Leader Joseph Stephen Paduano.
Apang wala nagpadulong sa siyudad si LTFRB 6 Regional Director Richard Osmenia kag nagpadala lang sang mga representative nga amo ang nagpamati sa concerns sang mga driver kag operators.
Isa sa mga ginpatpat sa pagsinapol amo ang isyu nahanungod sa Fuel Subsidy sang National Government.
Nahibaluan nga ang nagapanguna nga tinutuyo sang gobyerno amo nga mapalab-ot sa mga drivers ang bulig.
Apang may mga alegasyon nga naga-ungot lang sa operators ang Pantawid Pasada Card imbes nga magakadto sa driver.
Wala naman nagsabat sa mga pamangkot ang mga representative sang LTFRB Region 6.
Apang nagpasalig si Engr. Joshua Gaquit, Planning Officer 3 sa LTFRB Region 6, nga ipalab-ot sa higher office sang ahensya ang mga hingyo.
