BACOLOD CITY — 9 pesos ang ginrekomendar sang Land Transportation Franchising and Regulatory Board (LTFRB) Region 6 nga panibag-o nga pletehan sa public utility jeepneys sa bilog nga Western Visayas.
Ini ang kasunod sang nabaton nga petisyon sang mga transport groups sa rehiyon kadungan sang asud-asud nga pagsaka sang presyo sang produktong petrolyo.
Sa exclusive interview sang Bombo Radyo, ginpahayag ni LTFRB Region 6 Director Richard Osmeña nga naghingyo ang mga transport groups sang 10 pesos nga pamasahe samtang nagrekomendar naman ang National Economic and Development Authority, Department of Trade and Industry kag local government unit sang 8 pesos.
Gin-athag ni Osmeña nga magadepende sa gihapon sa LTFRB Central Office ang pinal nga desisyon kun pila ang panibag-o nga pamasahe.
Suno sa regional director, rasonable ang pagpasaka sang pletehan bangud wala sunod-sunod na ang pagsaka sang presyo sang produktong petrolyo.
Nahibaluan nga sa karon, 6 pesos kag 50 sentimos ang regular nga pletehan samtang lima ka pesos naman ang iya sang estudyante kag senior citizens matapos ang rollback nga ginpatuman sang Pebrero 1 tuig 2016.
Nagalaom ang LTFRB Region 6 nga may desisyon na ang central office sa tunga-tunga sang bulan sang Marso tuhoy sa saka sa pletehan sa public utility jeepneys sa Western Visayas.
