Ginpahayag ang tagpamaba sang Land Transportation Franchising and Regulatory Board (LTFRB) regional office 6 nga nagakadapat lang nga may yara sang complaint desk ang local government unit (LGU) nga amo ang maga-atender sang reklamo angot sa fuel subsidy program.
Ini ang kasunod sang pag-engganyo sang Department of Interior and Local Government (DILG) sa mga LGUs nga magbutang sang complaint desk para sa mga tricycle drivers.
Sa interview sang Bombo Radyo kay Atty. Salvador Altura, mas maayo nga may yara sang complaint desk nga ginabutang ang mga LGUs agud nga may yara sang mapalapitan ang mga pumuluyo indi lang para sa fuel subsidy kundi sa iban pa nga mga concerns sang gobyerno.
Suno kay Altura, ang LTFRB ang may yara sang gin-assign nga personnel agud nga magcater sang mga complaints sang fuel subsidy kag iban pa nga concerns kag ini ang ginaforward sa central office agud mahimuan sang tikang.
Ginalantaw nga mahimo wala sa karun sang complaint desk ang mga LGU bangud masako kasunod sang election period.
Suno kay Altura ang LTFRB ang nagacater lamang sa fuel subsidy sang mga Public Utility Jeepney (PUJ) samtang ang mga LGUs ang sa mga tricycle drivers.
Suno diri sa tion nga may yara sang reklamo ang mga tricycle drivers mahimo ang mga ini makig-angot sa ila tagsa ka mga LGU.
Nagpanugyan man ini sa mga jeepney drivers nga may yara sang complaints nga mahimo makig-angot ukon magpadala sang reklamo sa LTFRB regional office 6 ukon mahimo man magdirekta sa central office sang LTFRB.
