Gin-ako ni LTFRB Region 6 spokesperson Atty. Salvador Altura, madugay na nakita nga kinahanglan magbutang sang extension office sang Land Transportation Franchising and Regulatory Board diri sa ciudad.
Tinalikdan nga tinuig suno kay Altura, may ginbutang nga extension office sa Bacolod apang wala ini nagdugay bangud limitado ang pondo para diri.
Suno kay Altura, bisan nakita nga kinahanglan ang extension office diri sa ciudad, hampered ang operation bangud sa kakulang sang pondo.
Nagtinguha naman ang LTFRB nga makapangita sang pondo para sa expenses sang mga personnel apang kinahanglan man ang budget para sa physical needs sang opisina kaangay sang maintenance.
Nagtanyag naman ang Ayala Malls apang on process pa ang pagfinalize sini kag napalab-ot naman ang concern sa city government sang Bacolod.
Suno sa LTFRB Region 6 spokesperson, indi lang LTFRB Region 6 ang may kaangay nga problema kundi tanan nga rehiyon bangud wala ginahatagan ang departamento sang pondo agud nga magbutang sang opisina sa iban nga mga rehiyon.
Aminado si Altura nga kinahanglan ang extension offices sa Western Visayas bangud may duha ka highly urbanized cities sa Region 6 nga yara sa lain-lain nga isla.
Ginalauman naman ang congressional intervention agud nga makatukod sang extension office agud nga maka-allocate sang pondo ang national government para diri.
Nagalaom naman ini nga makabulig ang city government sang Bacolod sa ginaduso kag ginawelcome man nila ang development nga ginaduso ini ni Congressman Greg Gasataya.
