Ginkumpirmar naman ni LTFRB Regional Office 6 Director Richard Osmenia nga sila ang nakapadala naman sang show cause order para sa suspension sang 12 ka mga Ceres Bus sa kaangay nga ruta sang naaksidente sa Barangay Igbucagay, Hamtic, Antique sang Martes.
Suno diri, sang nabatun ang balita nga may napatay sa aksidente, gilayon ini nga nag-issue sang show cause order para sa preventive suspension apang antes paman ini makalab-ot una na nga nakapatuman sang 30-days suspension ang Vallacar Transit Inc.
Kasunod sang pagpadala sang show cause, ang LTFRB Region 6 ang magapatigayon naman sang imbestigasyon kag schedule hearing sa masunod nga semana.
Magapangayo man ang mga ini sang kopya sang CCTV footages sa lugar nga makabulig sa pagtumod kun diin nagikan ang problema nga nagluntad sa insidente.
Nagalaom naman si Osmenia nga makabalik gilayon ang byahe sa nasambitan nga routa bangod aminado ini nga madamo sang maapektuhan nga mga commuters sa lugar.
Suno diri, wala sang may luyag nga matabo ang aksidente gani ang pinaka-importante sa karun amo nga mabuligan ang mga biktima kag makapangita sang mga tikang agud malikawan nga masulit ang kaangay nga trahedya.
Nagpanawagan naman ini sa mga operator sang bisan ano nga public utility vehicles nga seguruhon ang road worthiness sang ginabyahe nga salakyan ilabi na nga ginalauman ang influx sang pasahero subong nga holiday season.
Suno naman kay LTFRB Chairman Teofilo Guadiz III, ini ang magahatag sang ligwa sa imbestigasyon sang insidente.
Kapin 15 ka mga buses sang kumpaniya nga regular nga nagabyahe sa routa ang apektado sang suspension.
Gina-imbestigahan sa karun sng mga otoridad kun ang nasambit nga bus company man ang na-imbolbar sa kaangay nga insidente pila ka tuig na ang nakaligad.
Una na nga ginpahayag sang Ceres Bus Liner nga sila ang handa nga magkooperar sa maskin ano nga imbestigasyon.
