Nagapati ang pinuno sang Land Transportation Office (LTO) sa Bacolod City nga pasado bilang pampubliko nga salakyan ang mga electric jeepneys.
Sa interview sang Bombo Radyo Bacolod kay Renato Novero, ginpaathag sini nga ang pagparehistro sa e-jeepneys ang kasubong man sa mga traditional kag modernized jeepneys.
Apang paathag ni Novero nga indi pa makasarang ang sistema sang LTO – Bacolod sa registration gani ang initial registration ang nagakinahanglan nga patigayunon sa Iloilo.
Magluwas sa LTO, sa regional office man sa Iloilo makakuha sang prangkisa sa Land Transportation Franchising and Regulatory Board (LTFRB).
Suno kay Novero, ang mga e-jeepneys ang sarang man nga iparehistro bilang pribado nga salakyan, apang sarang man makaproseso para sa initial registration kun luyag na nga ini ang himuon nga depampasahero nga jeep.
Pasalig sang LTO head nga pasado sa modernization program sang gobyerno ang e-jeepneys.
Apang aminado man si Novero nga indi pa sini masigurado kun pareho man ang igahatag nga ruta sang LTFRB sa e-jeepneys sa mga ruta sang traditional kag modernized jeepneys.
