Magadeploy sang 400 ka breath analyzers kag enforcement personnel ang Land Transportation Office (LTO) sa bug-os nga pungsod agud matumod ang mga nagamaneho nga yara sa impluwensiya sang makahulubog nga ilimnon.
Nahibaluan nga nag-issue ang ahensya sang show cause order sa babayi sa isa ka viral video nga nagamaneho samtang naga-inom sang ginasustpetsahan nga makahulubog nga ilimnon.
Suno kay LTO Chief Markus Lacanilao, samtang nagapadayon ang christmas activities ginalauman nga mas magadamo pa ang pareho nga insidente sang pagdrive nga hubog.
Ginpahayag ni Lacanillao nga sa idalom sang Republic Act 10586, ang mga nagadrive nga may .05 blood alcohol concentration ang ginkabig nga hubog.
Ang breath analyzers, ang sarang nga magtumod sang alcohol level sang isa ka persona.
Nahibaluan, nga ang alkohol ang nagatenir sa lawas sa sulod sang 4 tubtob 8 ka oras.
Panugyan sang ahensya, ilabi na sa tion sang Christmas season nga madamo ang pagtililipon, nga indi anay magdrive ukon mapahuway anay kun ara sa impluwensiya sang makahulubog nga ilimnon.
