Ginpaathag sang Land Transportation Office (LTO) Region 6 kun paano naangot sa reckless driving ang ginacharge sang LTO personnel sa driver sang public utility vehicle nga may pasahero nga madakpan nga wala nagasuksok sang face shield.
Sa interview sang Bombo Radyo Bacolod kay LTO Region 6 spokesperson Riza Otayde, nahulog sa reckless driving ang indi pagsuksok sang face shield sang driver ukon sang pasahero bangud nga ginabutang sini sa katalagman ang ikaayong lawas sang mga pasahero.
Gin-angot man ini sa ginpagwa nga Memorandum Circular No. 2020-031 sang Land Transportation Franchising and Regulatory Board (LTFRB) nga nagamando nga mandatory nga pagsuksok sang face shield sa mga driver kag pasahero sang pampubliko nga salakyan kun sa diin ang madakpan ang may multa nga P2,000 kag gina-issuehan sang Temporary Operator’s Permit (TOP).
Nanindugan man ini nga ang mga LTO personnel ang nagaimplementar lamang sang mandu sang IATF.
Nagpanawagan man ini sa mga pasahero nga magsuksok sang face shield sa tion nga magsakay sa pampubliko nga salakyan agud indi man mamultahan ang driver.
Ginpahayag man sini nga may responsibilidad ang driver nga indi magpasakay sa mga pasahero nga wala sang face shield kag sarang man sini nga papanaugon ang pasahero nga ginkakas ang face shield agud indi madakpan sang law enforcers kag mamultahan.
