Padal-an sang show cause order ang 17 anyos nga lalaki nga nagmaneho sang SUV nga nakabunggo sa tricycle sa intersection sang Gatuslao kag BS Aquino Streets sa ciudad sang Bacolod, kahapon sang kaagahon.
Madumduman nga ginamaneho sang 17 anyos ang SUV samtang ang tricycle naman ginamaneho ni Openiano Ayco, residente sang Purok Tumpok, Zone 15, Talisay City, kag sakay diri sanday Crislyn Joy Poja, Roda Tipon, Cheralyn Poja, kag Redilla Gamgam, lunsay mga residente sang Purok Sibucao, Brgy. Banago, Bacolod City.
Bangud sa makusog ang impact sang pagbunggo sang SUV sa tricycle, napatay sanday Cheralyn Poja, kag Redilla Gamgam.
Sa interview sang Bombo Radyo Bacolod kay LTO- NIR Regional Director Jeck Cunlo, padal-an sang show cause order ang driver kag may yara sang nagakaigo nga penalidad nga idagdag sa iya.
Suno diri, mahimo sini personal nga ipasa sa opisina sang LTO ang iya sabat ukon ipasa sini sa email, apang siya ipatawag gid sa opisina agud mag-explain kag amo na nga imbestigaran ang natabo agud mahibaloan kun ano ang penalidad sa iya.
Mahimo nga i-suspend ang iya lisensya ukon ikansela ini.
