Ginahulat na lang sang Land Transportation Office- Negros Island Region ang budget para sa pagtukod sang regional office kag dugang nga paghire sang personnel.
Sa interview sang Bombo Radyo Bacolod kay LTO- NIR Regional Director Jeck Cunlo, sa karun temporaryo nga nahamtang ang ila opisina sa Brgy Mansilingan, Bacolod City apang santo sa NIR law, sila naka-estasyon sa Negros Oriental.
Suno diri, ginakumpleto na nila ang pagtransfer sang mga dokumento kag records halin sa Region 6 kag Region 7 agud amat-amat naman nga mabutang ang staffing requirements.
Pahayag ni Cunlo, 50 ang kinahanglan nila nga plantilla position wala labot ang Job orders nga ginahire.
Suno pa diri, bangod nga yara na sa last quarter sang tuig, ginalauman sini nga sa masunod nga tuig may yara na sang budget agud makahire na sila kag malaplastar sang ila opisina.
Mahibaluan nga sa Negros Island Region, sa probinsya sang Negros Occidental, may yara sang walo ka LTO district offices samtang sa Negros Oriental naman may yara sang lima ka district offices.
Mensahe ni Cunlo, maghalong sa byahe, palaba-on ang pasensya kag intindihon ang mga commuters, mga nagatabok sa dalan, kag ang kaangay nga mga nagabyahe.
