Nagpaandam ang Land Transportation Office Negros Island Region (LTO-NIR) batok sa mga disrespectful acts sang mga operators, drivers kag kondutor sang modernized jeepney sa mga pasahero.
Sa interview sang Bombo Radyo kay LTO NIR Director Jeck Conlu, madamo na sila sang show cause order sa mga modernized jeepney kasubong man ang mga traditional jeepney bangud sa mga reklamo sang pasahero sa mga malain nga pamatasan sang mga konduktor.
Suno diri, majority sa Bacolod, madamo sang nagareklamo sa ila nga mga pasahero kag may yara sila sang ebidensya base sa mga ginaforward nga video sa ila.
Wala man ini ginpanginwala sang mga operator.
Lakip sa mga reklamo sang mga pasahero ang indi maayu nga pagtratar sang mga konduktor, pagbuya sang mga malain nga tinaga, kag body-shaming.
Ginpaandam sini nga ginadumilian gid ang body-shaming ukon anuman nga pambastos ilabi na sa mga kababainhan.
Ginpaathag ni Conlu nga gintawag nga Pulic Assistant Oficer (PAO) ang mga konduktor bangud sila ang naga-assist sa mga pasahero kag ang mga Public Utility Vehicle ang nagaserbisyo sa mga pasahero.
Gani suno diri, indi dapat ini nga paghimuon nga venue agud bastuson ang mga pasahero.
Suno kay Conlu, sila sa LTO ang wala nagtolerar sa mga kaangay nga pamatasan kag mahimo nga dagdagan sang maximum penalty ang mga PUV driver kag konduktor nga nagahimo sang mga indi maaayu nga pamatasan sa mga pasahero.
