Napuno sang emosyon ang lubong ni Negros Oriental Governor Roel Degamo sa Barangay Bonawon, Siaton, Negros Oriental kaina sang hapon.
Kaina ala-1:30 ang takna sang hapon sang naghalin sa ancestral house sang mga Degamo ang convoy nga nagdala sang bangkay sa Bonawon Catholic Church kung sa diin may flag sang Pilipinas nga nakabutang sa ibabaw sang lungon sini.
Linibo ka mga residente sang Negros Oriental ang nagtambong sa lubong kag kadam-an sa mga ini ang nagsuksok sang puti nga T-shirt nga may nakasulat nga JUSTICE FOR GOVERNOR DEGAMO AND OTHERS kag ini man ini ang ila ginasinggitan samtang ginakarga sa funeral car ang lungon sang ginpatay nga opisyal.
Napuno ang simbahan sang Bonawon bangud sa kadamuon sang mga residente nga nagtambong sa lubong.
Magluwas sa mga residente, nagtambong man ang mga local officials sa Negros Oriental.
Mismo ang mga police ang naghakwat sang lungon sang gobernador nagikan sa funeral car pasulod sa simbahan.
Madamo naman sang mga suldado kag mga pulis ang naghatag sang seguridad nagikan sa ila nga balay tubtob sa sulod sang simbahan.
Ang misa ang ginpangunahan ni Bishop Julito Cortes sang Diocese of Dumaguete nga ginhanduraw pagserbisyo ni Degamo sa probinsya.
Indi naman magpati ang byuda ni Degamo nga si Mayor Janice Degamo nga nahadlok si 3rd District Rep. Arnie Teves sa iya nga seguridad gani indi ini magpauli sa pungsod.
Suno kay Mayor Degamo, drama lang ang ginapagwa ni Teves bangud wala sang kaluoy ang mga tawo nga nagsulod sa ila nga bahay.
Nagpanawagan man ini sa national government nga ifreeze ang account ni Teves agud nga indi na sini magamit ang iya nga kwarta.
