Alas 6:00 na ang takna kagab-i natapos ang paglubong kay Negros Oriental Governor Roel Degamo, suno sa alkalde sang Dumaguete City.
Ala-1:30 ang takna kahapon sang hapon naghalin ang convoy matapos nga gindala sa San Vicente Ferrer Parish Church para sa misa.
Gin-updan sang linibo ka mga tawo kag ang misa ang ginpangunahan ni Most Reverend Bishop Julito Cortes.
Sa interview sang Bombo Radyo Bacolod kay Dumaguete City Mayor Felipe Antonio Remollo, ang misa ang most celebrated bangud ini ang ginselebrar man sang 20 tubtob 25 ka monsignors.
Suno kay Remollo, pagpadulong nila sa simbahan nagatagiti ang init apang sang ginapatigayon ang misa para sa bangkay sang gobernador sa San Vicente Ferrer Parish Church, nagbubo ang madamol nga ulan apang wala ini nakatublag sa mga supporters sang pinatay nga gobernador.
Nagpabilin ang mga ini tubtob nga gindala balik ang bangkay ni Governor Roel Degamo sa ila balay sa Bonawon agud didto ilubong sa tupad sang ila ginikanan kag iya nga utod nga babayi.
Sa simbahan matapos ang homily naghatag man sang mensahe ang pamilya sang gobernador nga ginpangunahan sang balo sini nga si Pamplona Mayor Janice Degamo kag ginsundan sang duha nila ka adopted nga mga kabataan nga lunsay mga board members man sa magkatuhay nga distrito sa probinsya.
Suno kay Remollo ang gobernador ang makamasa kag simple lamang ini kun yara ini sa ila balay nakatsinelas lamang ini kag sa kapitolyo, nagatshirt lamang.
Suno kay Remollo, ang dapat sundon nga pamatasan sang gobernador amo ang special relationship ukon direkta nga relasyon sa mga tawo.
Ini bangud bisan wala siya sang madamo nga alkalde sa partido sini, nagadaog ini gihapon bilang gobernador bangud palangga ini sang mga tawo kag direkta nga nagalab-ot sa mga pumuluyo ang medical kag social services gikan sa opisina sang gobernador.
Nagalaom man ini nga matapos ang paglubong sa gobernador may yara sang matabo nga dako nga pagbag-o sa peace and order situation sa Negros Oriental.
