May-ara na sang settlement sa tunga sang mga himata sang nagtaliwan nga driver sang motorsiklo kag driver sang SUV nga iya nabungguan sa dalan Araneta sa bangga sang Akina Village Subdivision, Barangay Tangub, Bacolod City sang Domingo sang hapon.
Madumduman nga ang biktima nga nadulaan sang kabuhi ang ginkilala kay Thomas Gidalanga Jr., 28 anyos, nga amo ang driver sang motorsiklo samtang angkas naman sini ang live-in partner nga si Beverly Pilongo, 26 anyos.
Ginkilala naman ang driver sang Toyota Innova nga si Chricel Yuro, 19 anyos, residente sang banwa sang Pulupandan, Negros Occidental kag sakay naman sini si Natasha Sun, 19 anyos nga residente sang Barangay Taloc, Bago City, Negros Occidental.
Ang duha ka partido ang lunsay padulong kuntani sa birthday party.
Suno kay P/Maj. Joery Puerto, station commander sang Bacolod City Police Station 8, may settlement na nga natabo matapos nga nag-atubang sa pamilya ni Gidalanga ang abogado nga ginpadala ni Yuro.
Ginkasugtan naman nga si Yuro ang magasabat sang tanan nga gasto sa pagpalubong sa driver sang motorsiklo kasubong man ang pagpabulong sa live in partner nga nasamaran.
Pahanumdom naman ni Puerto sa mga nagadala sang salakyan, ilabi na sa mga driver sang motorsiklo nga maghalong.
Nagpasalig naman ang Bacolod City Police Station 8 nga magabutang ang mga ini sang kapulisan sa mga dalanon agud nga mag-aligmat ang mga motorista kag matapna ang reckless driving kag overspeeding.
Ini ang ginalantaw man nga makabuhin sang kaso sa dalan kun sa diin nagakaulamid ang mga nagahalong nga motorista sa indi paghalong sang iban.
