Wala pa sang mabakod nga ebidensya nga nakita nga makapamatood nga natabo ang pagpatay kay Kristine Joy Dignadice sa Bacolod-Talisay intersection sa Bacolod-Silay Airport Access Road santo sa pahayag sang suspek nga si Police Staff Sgt. Enrique Gonzalodo, nga mobile patroller sang Bacolod Police Staton 5.
Suno kay Police Major West Edquila, Chief Forensic Doctor sang Regional Forensic Unit- Negros Island Region, may nakita nga gunpowder burns sa bangkay ni Dignadice santo sa resulta sang autopsy examination.
Suno diri, ini nagapakita nga close range ang pagluthang sa biktima.
Apang, wala sang may narekober nga basiyo sang bala sa sulod sang salakyan, sa Bacolod-Talisay intersection kag sa Central Ma-ao, Brgy Don Jorge Araneta sa Bago City kun diin ginbilin ni Gonzalodo ang bangkay.
Nagahulat pa sila kun may yara sang makuha nga CCTV footage ang Talisay City Component Police Station ukon witness sa natabo nga pagpatay.
