Tuman ka dako ang nangin kahalitan sang nangin pag-igo sang mabaskog nga pag-ulan nga nagtuga sang pagbaha sa nanari-sari nga bahin sang Pilipinas kalakip na ang Northern Negros Island sadtong Enero 8, 2021.
Kadungan sini pila man ka mga taytay ang narumpag bangod sa pagtaas sang tubig sa mga suba.
Isa sa narumpag nga taytay amo ang Malisbog Bridge sa ciudad sang Silay.
Agud nga makatabok ang mga residente sa pihak nga bahin sang suba, naghuman nalang ang mga residente sang improvised Zipline agud makadul-ong sadto sang mga pagkaon kag iban pa nga relief goods sa mga apektado nga residente.
Apang nakahibalo bala kamo nga makaligad sang halos lima ka bulan, tubtob sa karun wala gihapon sang taytay ang lugar.
Padayun ini nga nagahatag sang kabudlayan sa mga residente kaangay nalang sa pamilya sa Hda. Pulo, Purok Malisbog, Barangay Hawaiian, Silay City nga magapatabok kuntani sang ila nagtaliwan nga himata.
Naghuman nalang ang pamilya sang improvised zipline nga amo ang gingamit agod nga mapatabok ang lungon padulong sa ila himata.
Makita sa mga litrato nga ginpost sang isa ka netizen sa facebook nga karga sang improvised zipline ang lungon, mga carpet kag candle holder agud madala sa puluy-an sang namatyan para sa haya.
Samtang indi man mahapos ang pagtabok sa suba kun magaagi sa tubig bangod mataas ang banglid kag madalom ang nasambit nga suba.
