Temporaryo nga ginpauntat ang operasyon sang pila ka mga BPO company sa ciudad sang Bacolod matapos ang pagtay-og sang magnitude 6.9 nga linog sa Bogo, Cebu nga nabatyagan man sa Negros Occidental alas-9:59 kagab-i.
Sa paglibot sang Bombo News Team, gilayon nga nagwa ang mga call center agents kag mga empleyado nga nagatrabaho kun gab-i nagikan sa nagkalain-lain nga panalgan kag nagpadulong sa higad sang dalan.
Sa Barangay Mandalagan, ginpahayag ni Rollen Semillon, isa ka call center agent sa iQor, yara ini sa ika-11 nga panalgan sang ila nabatyagan ang pagtay-og.
Gilayon ini nga nagpangamuyo kag nagsunod sa duck cover and hold nga procedure.
Sila ang gin-abisuhan nga magpanaog sa building kag temporaryo nga gin-untat ang ila operasyon agud indi mabutang sa risgo ang kabuhi sang mga empleyado.
Bangud sa tuman kakusog nga impact, nagkaladagdag ang mga trophies apang intact naman ang mga computers.
May mga naglain ang pamatyag kag madamo ang naghilibion samtang nagapanaog.
Pagkatapos sang duha ka oras, amat-amat na nga ginpabalik ang mga agents sa trabaho.
Samtang suspendido naman ang klase sa tanan nga level kasubong man ang trabaho sa Bacolod City subong nga adlaw.
Wala man sang klase sa Bacolod City, Calatrava, EB Magalona, Manapla, Toboso, Escalante City, Victorias City, Sagay City, Kabankalan City, Silay City kag Talisay City.
