Ginalauman ang mas mabug-at nga lakat sang trapiko sa ciudad sang Bacolod kasunod sa pagpatigayon sang peace rally sang mga miyembro sang Iglesia Ni Cristo.
Ang road closure ginpatigayon sa bahin sang North kag South Capitol Road kag Cottage Road tubtob sa 15th street.
Sa interview sang Bombo Radyo Bacolod kay Bacolod Traffic Authority Office Deputy Head Jose Antonio “Jojo” Robello, nangin mabug-at ang lakat sang trapiko kaina sang aga kun sa diin madamo sang nagbyahe para magpadulong sa mga buluthuan kag trabaho kasubong man nga madamo sang nagbyahe nga mga INC members gikan sa nagkalain-lain nga lugar sa Negros Occidental, Negros Oriengtal kag Siquijor.
Suno diri, mas lauman ang mabug-at nga lakat sang trapiko subong nga hapon sa pagpauli sang mga estudyante kag mga trabahante kag amo man ang pag-umpisa sang proper nga program sang peace rally.
Suno sa iya, ang permit sang INC ang tubtob alas- 12:00 sang kaagahon kag ang programa ginalauman nga matapos alas- 8:00 tubtob alas- 9:00 sang gab-i.
Pahayag ni Robello, kaina sang aga matapos ang duty sang mga enforcers sa mga buluthuan ginpangdeploy naman sila para magderiher sang trapiko sa mga lugar nga may mabug-at nga traffic.
