Nagdangat sa 403 ang mga successful blood donors nga nag-ugyon sa Dugong Bombo 2019 sa City Mall Mandalagan, Bacolod City kahapon.
Malapit 600 ka mga persona ang nagpadulong sa venue agud magdonar apang 403 lang ang nakapasar sa screening kag nangin successful blood donors.
Ang iban nga mga donors ang temprano pa nagpadulong sa venue bangud sa excitement nga sila ang una nga makuhaan sang dugo.
Magluwas sa mga grupo kag organisasyon, madamo man ang mga walk-in donors nga nagpadulong sa City Mall Mandalagan.
Kadungan sini, nagpasalamat si Bombo Mary Divine Grace Cuello, Station Manager sang Bombo Radyo Bacolod, sa tanan nga nagsabat sa panawagan nahanungod sa blood donation.
Suno kay Cuello, nangin madinalag-on ang nasambit nga annual bloodletting project gani dako ang pagpasalamat sini sa mga volunteers kag donors ilabi na sa mga nagadonar kada tuig.
Sa 403 ka mga blood units, nakatipon sang 181,360 CC units sang dugo nga dako gid ang mabulig sa mga nagakinahanglan.
Nagpasalamat ang Philippine Red Cross Negros Occidental Bacolod City Chapter sa tanan nga nakigbahin sa Dugong Bombo 2019 sa City Mall Mandalagan kahapon.
Sa interview sang Bombo Radyo Bacolod kay Eloisa Marie Liza, Donor Recruitment Officer sang PRC-NOBCC, ginpahayag sini nga nangin madinalag-on ang blood donation sini nga tuig bangud may yara sang natipon nga 403 blood units.
Aminado si Liza nga mas manubo ang numero sang mga successful blood donors subong nga tuig kun ikomparar sang nagligad nga tuig nga may yara sa 422 blood units apang suno sa iya, dako na ang mabulig sang natipon nga dugo sa mga nagakinahanglan.
Ginpahayag man sang recruitment officer nga manami ang feedback sang mga donors bangud suno sa ila, nangin maayo ang pag-organisar sang programa kag nangin komportable gid sila samtang ginakuhaan sang dugo.
Nagpangagda man ini sa mga wala nakadonar nga mag-ugyon sa masunod nga tuig bangud dako gid ang mabulig sang pagdonar sang dugo indi lang sa mga nagakinahanglan kundi pati sa ikaayong-lawas.
