Ginpakigbahin sang isa ka machine operator sang Skiff boat nga ginsakyan sang 22 ka mga tripulante nga nakasalbar sang naglugdang ang fishing vessel nga FV St. Peter The Fisherman II sa tunga sang Sicogon Island sa Carles, Iloilo kag Cadiz City, Negros Occidental kun paano naglugdang ang barko.
Sa exclusive interview sang Bombo Radyo Bacolod kay Alyas Jun Jun, ginpahayag sini nga nagascanning na sila sang natabo ang insidente bangud may yara na sang unod nga isda nga tuloy ang ila nga pukot nga ginabanta magadangat sa 300 ka banyera.
Suno kay Alyas Jun Jun indi na balanse ang barko bangud nagtakingking na ini sa nawala nga bahin samtang nalock naman sang nagamaneho sang barko ang manobela sa natuo nga bahin gani naghabyog ang barko kag ini ang naglugdang.
Bangud gulpyada ang natabo, ulihi niya na nakita nga elise nalang sang barko ang nagalutaw sa tubig.
Suno pa diri wala na nakapreparar ang siyam ka mga crew sang barko nga namissing kun sa diin apat na sa mga ini ang naretrieve, bangud nagakatulog ang mga ini sang natabo ang insidente.
Suno kay Alyas Jun Jun, ginhingagaw nila nga marescue ang 22 nila ka mga kaupdanan nga lunsay mga nakabugtaw sang natabo ang paglugdang sang barko kag ginsaylo sa isa nila ka escort boat.
Nagpasalamat man ini nga may yara ini sang presence of mind sang nagtakilid ang barko kag nahingagaw sini ka utod ang kalat nga naga-angot sa barko, bangod kun wala nya ini mautod madamo pa sang mahimo napatay.
