Pasakaan sang kaso sang Bacolod City Legal Office ang mga indibidwal nga matumod sang mga ini nga responsable sa pagpangawat sang kabilya sa Bacolod vendors plaza.
Sa interview sang Bombo Radyo Bacolod kay Bacolod City Legal Officer Atty. Romeo Carlos Ting Jr., kun matumod nila ang nagapangawat, pasakaan nila ini sang kaso.
Suno kay Ting, nagestoryahan na sila ni POSO head Retired General Primitivo Tabujara kag nagpahayag ini nga butangan nalang sang magabantay bangud bisan tungang-adlaw ang kawatan ang wala matahap nga madakpan.
Samtang ang 22 ka pamilya nga maapektuhan sang proyekto ang napahibalo na nga kinahanglan na sang mga ini nga maghalin sa lugar kag nahatagan naman ang mga ini sang ciudad sang kwarta apang wala pa maghalin.
Suno kay Ting, kinahanglan na sang mga ini nga maghalin bangud luyag na sang SM nga maumpisahan ang perimeter fence kag natalana na nga magpatigayon sang demolition.
