Ginreklamo sang pila ka mga barangay sa banwa sang Murcia ang poultry farm nga ginahalinan sang mga langaw nga naga-apekto sa mga pumuluyo.
Sa interview sang Bombo Radyo kay Punong Barangay Marilou Villanueva sang Brgy Lopez Jaena, tatlo ka mga barangay ang apektado sa pagduging sang langaw, ini ang ginalakipan sang barangay Caliban, Santa Rosa kag Lopez Jaena.
Suno diri, una na nga ginreklamo ang Araco Poultry & Livestock Corporation bangod sa maisog nga baho kag ini ang gilayon man nga nasolusyonan.
Apang, sa karun naga-antos naman ang mga pumuluyo sa pagduging sang langaw.
Nahimo na nga ginbutangan sang insect light trap, apang ini ang naguba bangod nga tuman ka damo sang langaw kag nagbutang naman ang mga pumuluyo sang fly paper, apang ini ang madasig man nga mapuno sang mga langaw.
Nakaagi naman nga nagpatigayon sang fogging ang poultry farm apang ginalipong lamang sini ang langaw.
Suno kay Villanueva, nakapaghinun-anon na ini sa head sang poultry nga si Joseph Anthony Aguilles kag operation manager nga si Richard Nagap nga nag-ako man sang ila kapaltahan sa pag-operate sang poultry farm.
Nag-ayo ini nga kun mahimo butangan sang kudal kag mataas nga screen ang poultry para nga indi makagwa ang langaw.
Nagpasalig naman ang poultry farm nga sila ang magahimo sang tikang para masolusyonan ang problema.
Sa karun, ginabantayan ang posible nga pagdamo pa gid sang langaw sa ginapaabot nga pag-harvest sang poultry sa masunod nga mga inadlaw.
Kag kasunod sini, nag-ayo ang punong barangay nga kun mahimo matapos ang ila pag-harvest, magpatigayon sila anay sang general cleaning sa kahangawa nga may yara sang maglain sang pamatyag.
