Ginkakibot sang mga pumuluyo ang hinali nga pagtuhaw sang madamo nga mga lago sa higad sang suba sa Sitio Puli Barangay Orong, ciudad sang Kabankalan, Negros Occidental kasunod sang pagluntad sang Bagyo Kristine kag Bagyo Leon.
Suno kay Ricky Muscosa, Agriculturist sang Kabankalan City, matapos ang ginpatigayon nga pagpangusisa sang ila talatapan upod sa mga personnel sang Office of the Provincial Agriculturist sang Huwebes, ginalantaw nga nadisturbo ang natural habitat sang mga lago malapit sa pangpang sang suba gani nagwa ang mga ini.
Suno kay Muscosa, nagsaka ang mga lago agud nga indi man ang mga ini maanod kag mapatay sa tion nga magsaka ang tubig sa suba bangud sa padayun nga pag-inulan tuga sang naglabay nga mga bagyo.
Dugang pa sini nga sa ila pagpangusisa sa mga pumuluyo sa lugar, nagatuhaw ang mga lago tagsa bulan sang Nobyembre kun sa diin maulanon ang panahon.
Ang lago ang sinyales nga healthy ang duta kag indi dapat magkabalaka ang mga pumuluyo sa pagwa sang mga ini.
