Ipalantaw sang pinuno sang Committee on Energy sa syudad sang Bacolod ang mga gasolinahan matapos nga madamo ang nagpadangat sang reklamo bangud tuman na kataas ang presyo sang produktong petroyo apisar nga wala pa nagtake effect ang oil price hike.
Kaina sang udto, naglibot ang Bombo News team kag nakita nga ang diesel ang nagdangat na sa P55.80 ang kada litro samtang ang platinum ang nagdangat na sa P61.00 kada litro.
Madamo man ang naghingagaw sa pagpatughong bangud sumugod bwas magatake effect na ang ginalauman nga pagsaka sang gatong.
Nahibaluan nga ang diesel ang magasaka sa P5.40 tubtob P5.50 kada litro samtang ang gasolina ang magasaka sa P3.40 tubtob P3.50 kada litro humalin sa March 8 tubtob 14.
Sa interview sang Bombo Radyo Bacolod kay Councilor Archie Baribar, aminado siya nga wala sila sang kontrol kun presyo sang gatong ang pagahambalan apang mahimo ini makacalibrate sa bahin sang deliveries sa idalom sang ordinansa nga ginpasar sini sadto.
Ginpahayag man sini nga kinahanglan lantawon ang mga pagsaka sang presyo sang gatong bangud magatuga ini sang dugang nga problema sa syudad kun magpadayun.
Suno kay Baribar diskusyunan nila kaupod ang Committee on Trading kag ang iban nga mga opisyales sang syudad ang nasambit nga problema agud mahatagan sang solusyon.
