Pila lang ka bayo ang nasalbar sang pila ka pumuluyo sa Purok Magnolia, Barangay 7, ciudad sang Bacolod kadungan sang sunog nga nagluntad kagab-i.
Suno kay Arlene Romero, gindumdom nila nga may nagainaway pasado alas-11:00 sa gab-i bangud may nagasinggitan, apang sa ila nga paggwa, dako na ang kalayo sa unhan.
Suno kay Romero, wala gid sila sang may nasalbar nga gamit magluwas sa pila ka bayo nga iya napudyot.
Wala naman sang uniform ang iya bana nga nagatrabaho bilang security guard bangud ini ang nasunog, kalakip na ang school uniforms sang iya kabataan.
Bangud sa kadakuon sang kalayo kag kadasigon sang paglapta sini, naupos gid ang ila balay.
Nagpasalamat naman ini bangud hilway sila kag wala sang may napilasan sa ila pamilya.
Nagpanawagan naman ini sang bulig sa may bulawanon nga tagipusuon nga ini ang ila kinahanglan.
Nangin emosyonal naman ang isa ka residente sang Purok Magnolia, Barangay 7 bangud wala gid ini sang nasalbar sa ila mga gamit matapos nga gintupok sang kalayo kasunod sang sunog.
Sa interview kay Leah Cocson, napulo sila tanan nga nagapuyo sa ila balay apang yara sila sa karun nagapabilin sa Andres Bonifacio Elementary School 2.
Suno kay Cocson, wala pa sila sang nabaton nga bulig gikan sa syudad kag wala pa man sang katapo sang Department of Social Services and Development (DSSD) ang nagpadulong sa ila.
Nagapanawagan man sila sang bulig sa kun sin-o man ang may yara sang ikasarang bangud bisan panapton wala sila sang nasalbar.
