Bacolod City—Arestado ang tatlo ka mga lalaki matapos nakuhaan sang nagkalain-lain nga sahi sang armas kag mga bala sa isa ka hacienda sa banwa sang Hinigaran kahapon.
Ang pagkadakop sang mga ini ang gin-paagi sa pagserbe sang search warrant sang joint elements sang Hinigaran Municipal Police Station, Negros Occidental Provincial Mobile Force Company, kag Criminal Investigation and Detection Group (CIDG) Bacolod City.
Ginkilala ang mga arestado nga sanday Loreto Segovia Sr., 78-anyos, isa ka retired engineer, Jake Calumba, 38, caretaker sang motorpool kag Danilo Garnado, 47, caretaker sang manokan sa sulod sang hacienda sa Brgy. Pilar, Hinigaran.
Narekober sa posesyon sang mga ini ang isa ka M-16 A1 rifle nga may 6 ka magazines kag 130 live ammunitions, 12 gauge shotgun nga may 4 ka live ammunitions kag 9mm caliber pistol nga may duha ka magazines kag 12 ka live ammunitions.
Suno kay Police Chief Inspector Adelon Caacbay, OIC Head sang CIDG Bacolod City Field Unit, nag-apply sila sang search warrant para sa nasambit nga operasyon kasunod sang ginpadangat sa ila nga reklamo bangud sang pagbitbit sang armas sang mga suspetsado.
