Padayun pa ang paglagas sang 79th Infantry Battalion sang Philippine Army sa ginabanta pito ka mga remnants sang North Negros Front sang New Peoples Army nga ila naka-engkwentro sa Barangay Bandila, Toboso, Negros Occidental alas-4:00 kahapon sang hapon.
Sa interview sang Bombo Radyo Bacolod kay 1st Lt. Dan Carlo Amoza, civil military officer sang 79th IB, ginhold nila ang pagpagwa sang impormasyon kahapon bangod critical location ang lugar sang engkwentro, nga natabo sa boundary sang banwa sang Toboso kag Calatrava.
Suno diri, sila ang nakabatun sang tip gikan sa residente sa lugar tuhoy sa armado nga grupo, kag sila ang nakapatigayon ang surprise attack.
Ginseguro man nila nga matabo ang engkwentro sa bahin nga malayo na sa mga pumuluyo bangod taktika na sang mga rebelde nga ipalapit sa kumunidad ang engkwentro.
Bangod nasurpresa nila ang mga rebelde sa lima tubtob napulo ka minutos nga engkwentro, halos wala makaretaliate ang mga rebelde kag nagpinalagyo sa lainlain nga dereksyon.
Ang naka-engkwentro ang ginapatihan grupo ni Arnel Tapang nga amo man ang naka-engkwentro sang tinalikdan.
Sa paglagas sa mga rebelde, nakita nila ang madamo nga tinulo sang dugo, apang indi pa masegurado kun may napatay sa mga rebelde.
Nakarecover man sila sang pila ka mga kagamitan kag armas sang mga rebelde.
Pahanumdom ni Amoza nga duha lamang ang options sang makawala nga grupo, ang atubangon ang bilog nga pwersa militar ukon buy-an ang armas kag magsungka sa gobyerno.
