Naguba ang galingan ukon machine nga ginagamit sa paggaling sang bugas, pilit kag trigo sang isa ka vendor sa Burgos Public Market bangud sa asod-asod nga power interruption kag low voltage nga nagluntad kahapon.
Sa interview sang Bombo Radyo kay Ma. Elena Bulaklak, may ginagaling ang machine sini sang nagbrown-out kahapon sa Burgos Public Market.// Suno kay Bulaklak, makaduha ka beses gid ang power interruption kag sang ikaduha nga pagpatay kag hinali nga pabalik sang kuryente, nag-aso ang iya galingan kag nasunog ang motor sini.
Suno sa iya, apat kabilog ang ila machine apang ang isa ang naguba man sang Semana Santa gani ginhawa nila nga halong sang nabilin nga tatlo apang naguba pa ang isa bangud sa power interruption.
Suno diri, P6,000 ang balor kun magparewind ukon magpakay-o sang galingan.
Suno kay Bulaklak, kaina sang aga may nagluntad man nga low voltage kag ginpahingagaw sang mga vendors papatay ang main switch agud indi na masulit ang pagkaguba sang ila gamit sa hinali nga pagbalik sang kuryente.
Samtang, dako man nga hu-ol para sa tag-iya sang kapehan sa Burgos Public Market ang nagaluntad nga asod-asod nga brown out kag fluctuation sang kuryente.
Sa interview sang Bombo Radyo Bacolod kay Stella Payunan, patay-siga ang suga sa ila nga kapehan kagab-i bangod sa pagbrown-out nga maka-apekto sa ila nga negosyo.
Samtang magluwas sa kabudlayan sa trabaho, dako man ini nga risgo sa ikaayong lawas sang iya nga 65 anyos nga bana nga may hapo.
Paathag ni Payunan nga kun tuman ka init sang tiyempo, masami nga nagatukar ang hapo sang iya nga bana.
Bangod sini, sila ang nagadalagan pa padulong sa City Health Office agud makagamit sang nebulizer.
