Ginapahanumdom sang Office of the Civil Defense – Negros Island Region nga mag-aligmat bangod apisar Tropical Depression lamang ang Bagyo WILMA, ini ang ginalauman nga magabubo sang madamol nga ulan.
Sa interview sang Bombo Radyo Bacolod kay OCD-NIR Director Donato Sermeno III, nagpatigayon na sila sang Miyerkules sang pre-disaster risk assessment meeting para sa pagsulod sang Bagyo WILMA.
Ini ang gintambungan sang mga local government units, local disaster risk reduction and management offices kag mga national agencies nga involved sa pagresponder sa tion sang mga kalamidad.
Lakip sa nagakoordinar ang Philippine National Police, Philippine Coast Guard kag Department of Health nga nagaresponder man sa mga kalamidad.
Suno kay Sermeno, lauman ang mas madamol nga mga pag-ulan bangod ang Bagyo WILMA ang may apid pa nga Shear Line kag Frontal System.
Gani panawagan sini ang preemptive evacuation sa mga lugar nga masami ginabaha agud malikawan ang casualties.
Luwas sa mga LDRRMOs, preparado naman ang supplies kag pagkaon para sa mga evacuees.
Pasalig ni Sermeno nga bastante na nga prepositioned nga food items sa kada local government unit (LGUs).
Aminado ini nga may LGUs pa nga wala sang storage area, nga suno diri dapat magpangita na sang temprano sang mahamtangan sang mga prepositioned food items.
Bukas naman ang mga evacuation centers sa pagbatun sang evacuees, apang aminado si Sermeno nga sa masami ini ang kulang sa kadamuon sang nagabakwit.
Na-estorya na sini ang Regional Director sang Department of Education nga nagpasalig na nga sarang magamit ang eskwelahan inkaso kinahanglanon.
Suno kay Sermeno, bangod sa Bulkan Kanlaon, ginpaidalom nila sa red alert status ang bilog nga Negros Island.
