Nadakpan na ang madrasto nga naglugos sa iya manak sa Barangay Cabug, ciudad sang Bacolod kahapon sang kaagahon.
Sa interview sang Bombo Radyo Bacolod kay Police Lieutenant Jovito Pastrana, hepe sang Bacolod Police Station 9, ginpahayag sini nga natigayon nila nga madakpan ang suspetsado nga si Jerome Minosa, 27-anyos sa Purok Kalubihan, Barangay Tabunan, Bago City kahapon sang hapon.
Suno kay Pastrana, nakapalagyo si Minosa sang ila ini ginkadtuan sa Barangay Cabug matapos mag-report sa ila ang 11-anyos nga biktima upod ang iloy sini nga ginhimuslan sang suspetsado ang iya manak.
Kahapon sang hapon, may yara sang nakakita sa iya sa Barangay Tabunan kag gilayon sang mga ini nga ginpahibalo ang Police Station 9.
Sa pagresponde sang kapulisan, nagtuyo pa nga magbato si Minosa bangud may bitbit ini nga binangon.
Apang sa pag-engganyo sang iya magulang, boluntaryo man ini dayon nga nagsungka.
Ginapahayag nga ginpasudlan sang suspetsado sang tudlo ang kinatawo sang biktima.
Kag santo man sa medical examination, positibo nga ginhimuslan ang 11-anyos nga bata.
Nahibaluan nga makapila na ka beses nga ginhimuslan sang suspetsado ang iya manak kag nakahibalo man ang iloy sini.
Nagsalig ang nanay sang bata nga indi na pagsuliton pa ni Minosa ang natabo, apang nakibot ini kahapon sang magpanugid ang iya bata nga gintandog siya sang suspetsado.
Sa karon, nakahunong na sa Police Station 9 si Minosa.
