Igalubong na bwas ang maestra kag iya bana nga ginpatay sang principal sang Bilbao Uybico National High School sa Barangay Po-ok, Hinobaan, Negros Occidental sang Abril 12 kun sa diin nagpanginmatay man ang principal.
Sa interview sang Bombo Radyo kay Richard Gelangre, presidente sang Bacolod City Public School Teachers Federation, magatambong sila sa lubong sa Barangay Manuling, Cauayan, ala-1:00 bwas sa hapon agud personal man nga madul-ong ang bulig pinansyal sang mga manunudlo sa Bacolod kag makabuylog man sa kasubo sang pamilya.
Suno kay Gelangre, nag-amot-amot ang mga manunudlo sa ciudad base sa ila personal nga masarangan agud nga makabulig sa kaangay man nga personnel sang Department of Education ilabi na nga magagmay pa ang kabataan nanday Almarisa kag Christopher Aroy.
Bangud may ikasarang man ang pamilya sang principal nga si Warren Escosar.
Aminado si Gelangre nga madugay pa ang burial benefits nagikan sa GSIS gani nag-amot ang mga manunudlo agud nga makahatag sang bulig sa pamilya Aroy.
Nagalaom naman si Gelangre nga makapatigayon ang DepEd sang psychological clinic antes ang pagbalik sang face-to-face classes agud mahatagan sang test ang teaching personnel kag mahibaluan ang ila psychological condition ilabi na nga duha na ka tuig ang COVID pandemic nga may epekto sa mental state.
Suno kay Gelangre, kasubo ang hinali nga pagkadula ni Mrs. Aroy bangud nagikan man ini sa pigado nga pamilya kag nagtinguha sa pagtuon tubtub nga nangin maestra.
Aminado man ini nga mahimo kuntani nga napunggan ang hitabo kun nahatagan sang atensyon sang DepEd ang complaint angot sa sexual harassment.
