Patay ang maestra kag bana sini matapos gintiro sang principal sang Bilbao Uybico National High School sa Brgy. Po-ok, Hinobaan, Negros Occidental kaina sang aga samtang nagpanginmatay man ang suspetsado matapos ang krimen.
Sa interview sang Bombo Radyo kay Police Major John Ganzon, hepe sang Hinobaan Municipal Police Station, bag-o lang sampot sa eskwelahan ang mag-asawa nga Christopher kag Almarisa Aroy, alas-8:30 sang aga, sang ginpalapitan sang principal nga si Warren Escosar nga may dala nga shotgun.
Nakita sang pila ka manunudlo nga may gamay nga pagbaisay sa tunga sang maestra kag sang principal apang makadali lang ini bangud gintiro ni Escosar si Mr. Aroy.
Dead on the spot ang bana.
Nakapalagyo pa ang maestra apang ginlagas ini sang principal tubtub nga iya nalab-ot sa isa ka classroom kag didto na gintiro tubtub mapatay.
Nagbalik ang principal sa iya nga salakyan nga Nissan Navarra nga nagapark sa parking area sang eskwelahan, nagkuha sang caliber .45 pistol kag naghikog.
Suno kay Ganzon, ginalantaw nga mahimo ginhulat sang 56-anyos nga principal ang mag-asawa bangud nagapark na ang pick-up sang magsampot ang mga Aroy.
Si Mrs. Aroy ang nagaedad sang 35-anyos kag halos tubo-tubo lang sila sang iya bana nga nagatrabaho sa call center company.
