Patay ang maestro sa Binalbagan Catholic College matapos nga ginbuno samtang nagalakat malapit lang sa eskwelahan sa Doma Street, Barangay San Pedro, Binalbagan kaina sang kaagahon.
Suno kay Police Lt. Glen Fortunes, deputy chief sang Binalbagan Municipal Police Station, ang biktima ang ginkilala kay Tony Lazaga, 51-anyos, kag newly-appointed nga adviser sang Supreme Student Government sang Binalbagan Catholic College.
Nagalakat lang si Lazaga papauli sa iya nga boarding house nga malapit lang sa eskwelahan bangud namirthday ini sa Bacolod kagab-i.
Si Lazaga ang tumandok sang Barangay 35, ciudad sang Bacolod apang masobra na 10 ka tuig nga nagatudlo sa Binalbagan Catholic College gani naga-board ini sa balay-dalayunan nga ginapanag-iyahan sang iya nga co-teacher sa tupad lang sang BCC.
16 ka stab wounds ang gin-agom ni Lazaga sa nagkalain-lain nga bahin sang lawas kag may yara sang patimaan nga ini ang nagbato.
Suno kay Fortunes, hold-up ang initial motive nga ila ginalantaw sa krimen bangud nadula ang iya cellphone, apang yara pa sa tupad sini ang iya nga laptop kag nagatungtong diri ang iya nga wallet nga may unod nga kwarta.
Nakarecover sa crime scene ang stainless nga kutsilyo nga gingamit sa krimen.
Suno kay Fortunes, tatlo ka suspetsado ang ginalantaw nga responsable sa krimen apang igareview pa ang mga CCTV camera nga mahimo nakacapture sa natabo.
Base sa pagpangusisa sang Binalbagan Municipal Police Station, friendly nga sahi sang tawo si Lazaga kag mabuot ini nga maestro.
