BACOLOD CITY — Isa pa ka maestro sang Paglaum Village National High School sa Brgy. Mansilingan sa ciudad sang Bacolod ang nagkumpirmar nga biktima man ini sang pagpanakit sang ginreklamo nga maestra nga si Emelyn Mercorio.
Ginpahayag ni Stephen Lascano nga ginsumbag ini kag ginbuyayaw ni Mercorio tinalikdan nga Enero 2017 bangud nga ginpabangdan siya sini nga nagtulod sang una nga batch sang Senior High students nga naggraduate sang Marso 2018 nga magsulat sa principal nga si Lourdes de Paula.
Suno kay Lascano, Oktubre 2016 pa lang nagareklamo na ang mga estudyante nga ginapaamot niya ini sa photocopy apang wala man nagadiscuss sa klase kag masami nga wala nagaklase.
Si Lascano ang nag-endorso sang sulat sa Principal’s Office rason nga ginpabangdan siya ni Mercorio nga amo ang nagtulod sa mga estudyante.
Bangud sang insidente, ginsumbag siya ni Mercorio kag ginbuyayaw nga nangin rason agud pasakaan niya ini sang administrative complaint sa Department of Education Division of Bacolod City kag ginpasa sa regional office sang buhi pa ang Negros Island Region (NIR).
Apang bangud nga ginbungkag na ang NIR, ginafollow-up karun ni Lascano ang iya nga reklamo administratibo batok kay Mercorio.
Suno diri, bisan nga ginsakit siya ni Mercorio wala gid niya ini ginbatuan kag ginsakit agud indi siya sini mabalusan pinaagi sa pagdemanda bangud sang Violence Against Women and Children (VAWC).
