Arestado ang mag-amay nga suspek sa pagpatay sa isa ka mangunguma sa Purok Lanipga, Barangay. Minoyan, Murcia, Negros Occidental matapos ang ginpatigayon sang mga kapulisan nga hot pursuit operation.
Nahibaluan nga napatay ang 54 anyos nga mangunguma matapos nga gintiro sang Mayo 17 sang gab-i sa Purok Lanipga, Barangay Minoyan, banwa sang Murcia, Negros Occidental.
Ang biktima ang ginkilala kay Alyas Carlito nga nakaagom sang pilas sa tiyan.
Ang mga suspek ang ginkilala nga sanday Charlie, legal ang edad, single, mangunguma kag residente sang Purok Manuyong-suyong, Barangay Minoyan kag Bienvinido, 69 anyos, male, kasado, mangunguma kag residente sang Purok Lanipga, Brgy. Minoyan, Negros Occidental.
Sa interview sang Bombo Radyo Bacolod kay Police Major Sherwin Fernandez, hepe sang Murcia Municipal Police Station nadakpan ang duha bangud nga positibo ang mga ini nga ginkilala sang pamilya sang biktima.
Suno sa hepe matapos ang ginpatigayon nga ocular investigation kag hot pursuit operation natigayon nga madakpan ang amay nga suspetsado.
Dugang pa sini sang Domingo, nadakpan man ang bata nga suspetsado.
Suno kay Fernandez, natabo ang aksidente mga alas-7:20 ang takna sa gab-i samtang nagapreparar sang panyapon ang pamilya sang hinali nag abot ang mga suspetsado kag gulpi nagpalupok kag taya sa biktima.
Suno sa asawa wala nakasulod ang mga suspek sa balay sang biktima apang bangud nga himo sa kawayan ang dingding sang balay diri gindasok ang punta sang armas kag ginpalupok kag naigo ang biktima.
Samtang, nakilala naman sang bata sang biktima ang mga suspek matapos magpasiga sang flashlight sa palibot.
Suno sa panaysayon sang asawa sang biktima ang gintunaan sang krimen amo ang away sa duha kun sa diin nagalaksamanay sang duta nga ginatamnan sang kape ang biktima kag ang suspetsado.
Samtang may impormasyon nga nakuha sang hepe sa lugar ang biktima ang ginapasibangdan man ang pamilya sang suspek nga nagapangkuha sang ila tinamnan.
Sa karon, ginapreparar sang mga kapulisan sang Murcia ang kaso nga murder batok sa mag amay nga nga suspek nga nakahunong sa Murcia Municipal Police Station.
